ACJU/FTW/2020/00-000

 

11.06.2020

19.10.1441

 

அன்புடையீர்!

அஸ்ஸலாமு அலைக்கும் வறஹ்மத்துல்லாஹி வபறகாத்துஹ்

 

19.06.2020 வெள்ளிக் கிழமை ஜுமுஆ நடாத்துவது தொடர்பாக

 

  • நிச்சயமாக அனைவரும் ஜுமுஆ தொழ வேண்டும் என்ற ஆசை உள்ளது என்பதில் எவ்வித சந்தேகமும் இல்லை. எனினும், அனைவருக்கும் ஜுமுஆ தொழுவதற்கான சாத்தியப்பாடு இல்லாத நிர்ப்பந்தம் இருப்பதால் ஜுமுஆ தொழுகை தொழ சந்தர்ப்பம் கிடைக்காதவர்களுக்கும் ஜுமுஆவை நிறைவேற்றிய நன்மை கிடைக்கும் என்பதில் சந்தேகம் இல்லை.

 

  • ஜுமுஆ நடைபெறும் மஸ்ஜித்களில் சமூக இடைவெளி பேணி அனைவரும் ஜுமுஆவை நிறைவேற்ற முடியாது என்பதால், ஏனைய தக்கியாக்கள் ஸாவியாக்கள் போன்ற பொது இடங்களில் உரிய அதிகாரிகளின் அனுமதியைப் பெற்று ஜுமுஆத் தொழுகையை நிறைவேற்றுவற்கு வக்ப்ஃ சபை, முஸ்லிம் சமய பண்பாட்டலுவல்கள் திணைக்களம் மற்றும் அகில இலங்கை ஜமஇய்யத்துல் உலமா வழிகாட்டியுள்ளன.

 

  • இதுவிடயத்தில் மஸ்ஜித் நிர்வாகிகளுக்கு பூரண ஒத்துழைப்பு வழங்கி ஜுமுஆத் தொழுவதற்கு சந்தர்ப்பம் கிடைத்திருப்பவர்கள் மாத்திரம் ஜுமுஆத் தொழுது கொள்வதோடு ஏனையவர்கள் ழுஹ்ருடைய அதான் கூறியதும் ஆரம்பத்திலேயே தாம் இருக்கும் இடங்களில் ழுஹ்ர் தொழுகையை ஜமாஅத்தாக தொழுது கொள்ளுமாறு வேண்டிக் கொள்கின்றோம்.

 

  • மஸ்ஜித் நிர்வாகிகள் ஜம்இய்யாவின் பிரதேசக் கிளையுடன் இணைந்து ஜுமுஆத் தொழுவதற்கு அனுமதி கொடுப்பதற்கான பொருத்தமான வழிமுறையை கையாளுமாறு வேண்டிக் கொள்கின்றோம்.

 

  • இதுவிடயத்தில் தமக்குக் கிடைத்திருக்கும் சலுகையை பயன்படுத்துவதோடு, இச்சலுகையை நமது நடவடிக்கைகளால் இழப்பதற்கு காரணமாக அமைந்துவிடாமல் பார்த்துக் கொள்வது அவசியமாகும்.

 

  • தற்போது ஜுமுஆ நடாத்துவதற்கு அரசாங்கம் அனுமதி வழங்கியுள்ளதால், அரசாங்கம் கூறும் எண்ணிக்கையினர் சேர்ந்து முடியுமான இடங்களில் உரிய அதிகாரிகளின் அனுமதியைப் பெற்று ஜுமுஆவை நிறைவேற்றுவது கட்டாயமாகும். முடியுமாக இருந்து அதனை நிறைவேற்றாமல் விட்டுவிடுவது குற்றமாகும்.

 

  • ஊரில் ஜுமுஆ நடாத்தினால் சிலருக்குத்தான் ஜுமுஆ நிறைவேற்றக்கூடிய சந்தர்ப்பம் கிடைக்கும் பலருக்குக் கிடைக்காது என்ற பரிதாபத்திற்காக ஜுமுஆ நடாத்தாமல் இருப்பது தவறாகும்.

 

 

 

அஷ்ஷைக் எம்.எல்.எம் இல்யாஸ்

செயலாளர் - பத்வாக் குழு

அகில இலங்கை ஜம்இய்யத்துல் உலமா

ACJU/FTW/2020/11-395

 

16.06.2020

24.10.1441

 

அன்புடையீர்!

 

அஸ்ஸலாமு அலைக்கும் வறஹ்மத்துல்லாஹி வபறகாத்துஹு

 

கோவிட் 19 அசாதாரண நிலையில் ஜுமுஆ நடாத்துவது தொடர்பான மார்க்க வழிகாட்டல்

 

ஜுமுஆவை நிறைவேற்றுவது மார்க்கத்தில் மிகமுக்கிய கடமைகளில் ஒன்றாகும். அதனை நிறைவேற்றுவதற்கு மார்க்கத்தில் பல வழிகாட்டல்களும் நிபந்தனைகளுமுள்ளன. அவற்றைப் பேணிநடப்பது ஒவ்வொரு முஸ்லிமினதும் கடமையாகும். அத்துடன் தற்போது நிலவும் கோவிட் 19 அசாதாரண நிலையைக் கவனத்திற்கொண்டு சுகாதார அமைச்சு மற்றும் சம்பந்தப்பட்ட அதிகாரிகள் வெளியிட்டுள்ள வழிகாட்டல்களைப்பேணி ஜுமுஆவை நிறைவேற்றுதல் வேண்டும்.

 

  1. கோவிட் 19 பரவலைத் தடுப்பதற்காக, மதஸ்தலங்களில் ஒன்றுகூடுவோரின் எண்ணிக்கையை சுகாதார அதிகாரிகள் மட்டுப்படுத்தியுள்ளதால் அதனை விட அதிக எண்ணிக்கையுடையோர் ஒன்றுகூடுவது தவிர்க்கப்பட வேண்டும்.

 

  1. ஜுமுஆக் கடமை நிறைவேறுவதற்கு நிரந்தரக் குடியிருப்பாளர்கள், பருவவயதை அடைந்த 40 ஆண்கள் சமுகமளித்திருப்பது ஷாபிஈ மத்ஹபின்படி கட்டாயம் என்பதால், நிரந்தரக் குடியிருப்பாளர்கள் 40 ஆண்கள் ஒவ்வொரு ஜுமுஆவிலும் இருப்பதை உறுதி செய்துகொள்ள வேண்டும். இடநெருக்கடி அல்லது சுகாதார அதிகாரிகளின் அனுமதியின்மை அல்லது வேறு காரணங்களினால், 40 பேரைவிட குறைவான எண்ணிக்கையிருப்பின் அவர்கள் ழுஹ்ர் தொழுதுகொள்ள வேண்டும்.

 

  1. இடநெருக்கடியின் காரணமாக ஓர் ஊரில் பல இடங்களிலும் ஜுமுஆத் தொழமுடியும் என்ற மார்க்க சலுகையின் அடிப்படையில், தற்போதைய சூழலில் சமூக இடைவெளியை பேணி அனைவரும் ஒன்றுசேர்ந்து ஜுமுஆவை நிறைவேற்ற முடியாது என்ற நிலையில், பிரதேசக் கிளை ஜம்இய்யாக்களின் ஆலோசனையுடன் உரிய அதிகாரிகளின் அனுமதியைப் பெற்று ஜுமுஆ மஸ்ஜித்கள் ஏனைய மஸ்ஜித்கள், தக்கியாக்கள், ஸாவியாக்கள் போன்ற இடங்களில் ஜுமுஆவை நிறைவேற்றிக் கொள்ளல். சுகாதார அதிகாரிகள் (PHI) அனுமதியளிப்பின் மத்ரஸாக்கள், மண்டபங்கள், பொது இடங்கள் போன்றவற்றிலும் ஜுமுஆவை நிறைவேற்றிக் கொள்ள முடியும்.

 

  1. நோய், பிரயாணம், பயம், மழை தொழுகைக்கு செல்லமுடியாத நிர்ப்பந்தம் போன்ற காரணங்களினால் ஜுமுஆவுடைய கடமையை நிறைவேற்றாமல் விடுவதற்கு மார்க்கத்தில் அனுமதியுள்ளது.

 

  1. கோவிட் 19 அசாதாரண சூழ்நிலையில், அரசாங்கம் அனுமதிக்கும் எண்ணிக்கையினரை விட அதிகமானோர் ஒன்று சேர்வது தடைசெய்யப்பட்டுள்ள நிலையில், சமூக இடைவெளியைப் பேணி ஊரிலுள்ள அனைவரும் ஒன்றுசேர்ந்து ஜுமுஆவை நிறைவேற்றுவது சிரமம் என்பதால், ஜுமுஆவை நிறைவேற்ற சந்தர்ப்பம் கிடைக்காதவர்கள் ழுஹ்ருடைய தொழுகையை தொழுது கொள்வது போதுமானது. நிர்ப்பந்த நிலையில் ஜுமுஆவை நிறைவேற்ற முடியாமல் போனதால், ஜுமுஆவை விட்ட குற்றம் ஏற்படாது. மாறாக அதற்குரிய நன்மை கிடைக்கும்.

 

  1. இவ்விடயத்தில் ஊர் ஜமாஅத்தினர் தமது மஸ்ஜித் நிர்வாகிகளுக்கு பூரண ஒத்துழைப்பு வழங்கி, முடியுமானவர்கள் ஜுமுஆவை நிறைவேற்றுவதுடன், ஏனையவர்கள் ழுஹ்ருடைய தொழுகையை தொழுதுகொள்ளல் வேண்டும்.

 

  1. எமது நாட்டில் மஸ்ஜித்களுக்கு பொறுப்பாகவுள்ள வக்ஃப் சபை மற்றும் முஸ்லிம் சமய பண்பாட்டலுவல்கள் திணைக்களம் ஆகியவற்றின் வழிகாட்டல்களையும் கவனத்திற் கொள்ளவும்.

 

குறிப்பு : ஓர் ஊரில் பல இடங்களில் ஜுமுஆ நடாத்துவதற்குரிய சலுகை, தற்பொழுது நாட்டில் நிலவும் கோவிட் 19 நெருக்கடி நிலை நீங்கும் வரையாகும். இந்நெருக்கடி நிலை நீங்கி நாடு இயல்புநிலைக்கு திரும்பியதன் பின்பு, இவ்வாறு பல இடங்களிலும் ஜுமுஆக்களை நடாத்துவதை நிறுத்தி, வழமையாக ஜுமுஆ நடைபெற்ற இடங்களில் மாத்திரம் ஜுமுஆக்களை நிறைவேற்றிக் கொள்ள வேண்டும். அவ்வாறு செய்வதே, மார்க்க விதிகளின்படி ஜுமூஆக்கள் நிறைவேறுவதற்கு காரணமாக அமையும்.

 

மேற்கூறப்பட்ட முறைகளில் ஓர் ஊரில் பல இடங்களில் ஜுமுஆ நடாத்துவதற்குரிய ஏற்பாடுகளை செய்துகொள்ள முடியாதவர்கள் பத்வாப் பிரிவின் துரித இலக்கத்தை 0117490420 தொடர்பு கொள்ளவும்.

 “அல்லாஹ்வே யாவற்றையும் நன்கு அறிந்தவன்”.

 

 

 

அஷ்ஷைக் எம்.எல்.எம் இல்யாஸ்

செயலாளர் - பத்வாக் குழு

அகில இலங்கை ஜம்இய்யத்துல் உலமா

ACJU/FRL/2020/10/231

13.06.2020

21.10.1441

 

    

அன்புடையீர்!

அஸ்ஸலாமு அலைக்கும் வறஹ்மத்துல்லாஹி வபறகாத்துஹு

மஸ்ஜித்கள் மீண்டும் திறக்கப்பட்டிருக்கும் போது ஜமாஅத் தொழுகைகளில் கடைபிடிக்க வேண்டிய ஒழுங்குகள்

நாட்டில் கோவிட்-19 எனும் கொரோனா வைரஸ் நோய் பரவியதன் காரணமாக மக்கள் ஒன்று கூடும் நிலைமைகளைத் தவிர்ப்பதற்காக மஸ்ஜித்களை மூடிவிட தீர்மானிக்கப்பட்டது. தற்போது சில கட்டுப்பாடுகளுடன் மஸ்ஜித்களை திறப்பதற்கு அரசாங்கம் அனுமதி வழங்கியுள்ளது. அவர்களுடைய வழிகாட்டலில் 50 நபர்களை விட அதிகமாக ஒரு இடத்தில் ஒன்று சேரக் கூடாது என்பது மிக முக்கியமானதாகும்.

ஆகவே, மஸ்ஜித்களில் தொழுகைகாக ஒன்று சேறும் பொழுது பின்வரும் விதிமுறைகளைக் கடைப்பிடிக்குமாறு பொதுமக்களையும் மஸ்ஜித் நிருவாகிகளையும் அகில இலங்கை ஜம்இய்யத்துல் உலமா வேண்டிக் கொள்கின்றது.

 

மஸ்ஜிதுக்கு செல்லும் போது வீட்டிலிருந்தே வுழூ செய்து கொண்டு செல்லல்.

யார் தமது வீட்டிலேயே வுழூ செய்துவிட்டு இறைக் கட்டளைகளான தொழுகைகளில் ஒன்றை நிறைவேற்றுவதற்காக இறையில்லங்களில் ஒன்றை நோக்கி நடந்து செல்கிறாரோ, அவர் எடுத்துவைக்கும் இரு காலடிகளில் ஒன்று அவருடைய தவறுகளில் ஒன்றை அழித்துவிடுகிறது மற்றொன்று அவருடைய அந்தஸ்த்தை உயர்த்தி விடுகிறது என நபி ஸல்லல்லாஹு அலைஹி வஸல்லம் அவர்கள் கூறியதாக அபூ ஹுரைரா றழியல்லாஹு அன்ஹு அவர்கள் அறிவிக்கிறார்கள். (ஸஹீஹு முஸ்லிம் : 666)

ஸப்புகளில் நிற்கும் போது சமூக இடைவெளி 1 மீற்றர் தூரத்தைப் பேணுதல். நிர்ப்பந்த நிலையில் இவ்வாறு செய்யும் போது அதற்கான பரிபூரண கூலி கிடைக்கும்.

 

சுகாதார அமைச்சினால் ஒரு இடத்தில் 50 பேர்கள் மாத்திரம் ஒன்று சேர்வதற்கு அனுமதியளித்திருப்பதால், அந்த எண்ணிக்கையை மாத்திரம் மஸ்ஜிதுக்குள் அனுமதித்தல்.

 

ஐம்பது நபர்களை விட அதிகமானவர்கள் தொழுகைக்காக ஒன்று சேரக்கூடிய இடங்களில் பல ஜமாஅத்துக்களை நடாத்தலாம். ஒவ்வொரு ஜமாஅத் தொழுகைக்கும் நேரத்தைக் குறிப்பிட்டு மக்களுக்கு அறிவித்தல். முதலாவது ஜமாஅத் முடிந்து மக்கள் வெளியே சென்றதன் பின் அடுத்த ஜமாஅத்தை நடாத்துதல்.

 

குறிப்பாக பஜ்ர் மற்றும் மஃரிப் தொழுகையுடைய நேரங்கள் சுருக்கமாக இருப்பதனால் அதிகமாக மக்கள் ஒன்று சேரக்கூடிய மஸ்ஜித்களில், ஆரம்ப நேரத்திலே முதலாவது ஜமாஅத்தை நடாத்தி அதனைத் தொடர்ந்து தேவைக்கேற்ப பல ஜமாஅத்துக்களை நடாத்திக் கொள்ளலாம். இதற்காக மஸ்ஜித்களில் கடமை புரியும் இமாம்களுடன், மஹல்லாவில் இருக்கும் இமாமத்துக்குத் தகுதியானவர்களை நியமித்துக் கொள்ளலாம்.

 

முன், பின் சுன்னத்தான தொழுகைகளை தத்தமது வீடுகளிலே தொழுது கொள்ளல்.

 

சிறு பிள்ளைகள் மற்றும் நோயாளிகள் தற்போதைக்கு மஸ்ஜிதுக்கு சமுகமளிக்காமல், வீடுகளிலே தொழுது கொள்வது சிறந்தது. அதற்கான பரிபூரண கூலியை அல்லாஹ் வழங்குவான்.

 

வஸ்ஸலாம்

 

 

அஷ்ஷைக் எம்.எல்.எம் இல்யாஸ்      

செயலாளர் - பத்வாக் குழு        

அகில இலங்கை ஜம்இய்யத்துல் உலமா     

12.06.2020

கொவிட் 19 தொடர்பாக ஆரம்பம் முதல் மேற்கொள்ளப்பட்ட ஜம்இய்யாவின் சமூக சேவைகள் தொடர்பாக

 

அகில இலங்கை ஜம்இய்யத்துல் உலமா நாட்டில் அவ்வப்போது ஏற்பட்ட சுனாமி, யுத்தம், வெள்ளம் போன்ற அனர்த்தங்களின் போது பலரினதும் உதவிகளுடன் பல்வேறுபட்ட நிவாரணங்களை சமூக சேவைப் பிரிவினூடாக செய்ததை யாவரும் அறிவோம். உடனடித் தேவைகளாக இருந்த உலர் உணவுகளை வழங்குதல், தற்காலிக தங்குமிட வசதி போன்றவற்றையும் மற்றும் நிரந்தர தேவைகளான புணர் நிர்மாணம், மீள் கட்டமைப்பு போன்றவற்றையும் ஜம்இய்யா செய்து வந்துள்ளது. இதற்காக பலரும் பல வழிகளிலும் உதவிகள் செய்ததை ஜம்இய்யா நன்றியுடன் நினைவு கூர்கின்றது.

 

அந்த வகையில் இம்முறை கொவிட் 19 இலங்கையில் பரவ ஆரம்பித்தது முதல் அகில இலங்கை ஜம்இய்யத்துல் உலமா இது தொடர்பில் பல்வேறுபட்ட முன்னெடுப்புக்களை முன்னெடுத்தது. இவற்றுள் மக்களுக்கான மார்க்க மற்றும் பொதுவான வழிகாட்டல்கள் வழங்கியமை, ஊரடங்கு காரணமாக தொழில்களை இழந்து பாதிக்கப்பட்டவர்களுக்கான நிவாரணங்களை ஏற்பாடுச் செய்தமை போன்றவை முதன்மையானதாகும்.

 

மக்களுக்கான வழிகாட்டல் விடயத்தில் ஜம்இய்யா 25 அறிக்கைகள், 15 வீடியோக்கள், 23 சுவரொட்டிகள் மற்றும் 10 வானொலி நிகழ்ச்சிகள், 06 தொலைக்காட்சி நிகழ்ச்சிகள் போன்றவற்றினூடாக மும்மொழிகளிலும் பல மார்க்க மற்றும் பொதுவான வழிகாட்டல்களை ஆரம்பத்திலிருந்தே வழங்கி வந்தது. இவ்வழிகாட்டல்களில் நிவாரணங்களுக்காக சதகா மற்றும் ஸகாத் பணங்களை செலவழிப்பது தொடர்பான பூரண வழிகாட்டல்கள் வழங்கப்பட்டமை விஷேட அம்சமாகும்.

 

முன்னைய காலங்கள் போன்றல்லாது இவ்வைரஸின் பரவலானது பல்வேறு ரீதியில் நாட்டின் அனைத்து பகுதிகளும் மக்களைப் பாதித்த ஒரு பிரச்சினையாக இருந்ததை கவனத்திற் கொண்டு ஜம்இய்யா நேரடியாக நிவாரணங்களை முன்னெடுத்து வந்ததுடன், தனது 24 மாவட்டக்கிளைகளினூடாக நிவாரண மையங்களை நாடளாவிய ரீதியில் அமைப்பதற்கான வழிகாட்டல்களை வழங்கி, பலரின் ஒத்துழைப்புடன் சுமார் 60 இற்கும் மேற்பட்ட நிவாரண மையங்களை நாடளாவிய ரீதியில் செயற்படுத்தியது. இம்மையங்களினூடாக ஜம்இய்யா மஸ்ஜித்களை இணைத்து பாரிய நிவாரணப் பொறிமுறையொன்றை நிறுவியது. இதன் மூலம் பல மாவட்டங்களிலும் நிவாரணப் பணிகள் துரிதப்படுத்தப்பட்டன.

 

இந்நிவாரண பொறிமுறையினூடாக நிரந்தர நோயாளிகள், வறுமைக் கோட்டிற்குக் கீழ் வாழ்பவர்கள், கொரோனாவால் அன்றாட தொழில்களை இழந்தவர்கள், விதவைகள் என பலதரப்பட்டவர்களுக்கும் நிவாரணங்கள் வழங்கப்பட்டு வந்தது. அதே போன்று மஸ்ஜித் இமாம், முஅத்தின் மற்றும் மக்தப் முஅல்லிம்களுக்கான நிவாரணங்களையும் வழங்கியதுடன் ஜம்இய்யா இந்நிவாரணப்பணிகளில் தன்னாலான பண உதவிகளை முழுமையாக செலவழிக்கவும், தேசிய ரீதியில் கொவிட்19 தொடர்பான விடயங்களுக்காக ஜனாதிபதியால் ஆரம்பிக்கப்பட்டு சேகரிக்கப்படும் நிதியத்திற்காகவும் ஒரு தொகை நிதியை ஒதுக்கீடு செய்து அதற்கான பங்களிப்புக்களை வழங்கவும் தவறவில்லை. அல்லாஹுதஆலா இப்படியானதொரு தருணத்தில் நாம் செய்த அனைத்து தர்மங்களையும் ஏற்று இந்த வைரஸின் தாக்கத்திலிருந்து முழு உலகையும் அவசரமாக மீட்க வேண்டுமென பிரார்த்திக்கின்றோம்.

 

ஊடகப் பிரிவு

அகில இலங்கை ஜம்இய்யத்துல் உலமா

 

குறிப்பு: இது தொடர்பான விரிவாக அறிக்கையை கீழுள்ள லிங்கில் பெற்றுக் கொள்ள முடியும்.

 

 (Link: add the link) https://bit.ly/2BZM1qI 

 

அகில இலங்கை ஜம்இய்யத்துல் உலமாவின் சமூக சேவைப்பிரிவின் ஏற்பாட்டில் சுகாதார உபகரணங்கள் வழங்கும் நிகழ்வு

 

கொவிட் 19 வைரஸுக்கு எதிரான பல்வேறு வேலைத்திட்டங்கள் அரசாங்கத்தினாலும் பல்வேறு நிறுவனங்களினாலும் நடைபெறும் இச்சந்தர்ப்பத்தில் அகில இலங்கை ஜம்இய்யத்துல் உலமா சபையின் பங்களிப்பாக “கொவிட்-19 வைரஸுக்கு எதிரான போராட்டம்” என்ற தொணிப் பொருளின் கீழ் அகில இலங்கை ஜம்இய்யத்துல் உலமாவின் சமூக சேவைப்பிரிவின் ஏற்பாட்டில் வைரஸ் கிருமித் தொற்று நீக்கி,  சுகாதார உபகரணங்கள் வழங்கும் நிகழ்வு ஒன்று 10.06.2020 ஆம் திகதி ஜம்இய்யாவின் தலைமையகத்தில் நடைபெற்றது.

 

இத்திட்டத்தின் கீழ் மத்திய கொழும்புப் பிரதேச மாளிகாவத்தைப் பகுதியில் உள்ள விகாரைகள், தேவாலயங்கள், இந்துக் கோவில்கள், பள்ளிவாசல்கள், வைத்தியசாலைகள்,  பொலிஸ் நிலையங்கள் மற்றும் கொழும்பு பிரதேசச் செயலகம் என்பனவற்றிற்கு பொருட்கள் வழங்கி வைக்கப்பட்டன.

 

இதன்போது 10 ஆயிரம் பேருக்கு இலவசமாக முகக்கவசங்கள் வழங்கும் நிகழ்வின் முதற்கட்டமாக உலமா சபையின் அங்கத்தவர்களினால் மாளிகாவத்தைப் பிரதேசத்தில் முகக்கவசங்கள் வழங்கி வைக்கப்பட்டன. 

 

இந்நிகழ்வில் அகில இலங்கை ஜம்இய்யத்துல் உலமாவின் நிறைவேற்றுக்குழு உறுப்பினர்களான அஷ்-ஷைக் கலீல், அஷ்-ஷைக் எஸ்.எல்.நௌபர், அஷ்-ஷைக் தாஸிம்,  அஷ்-ஷைக்  அர்க்கம் நூராமித் ஆகியோரும் சமாதி தர்மாயத்தன விஹாரையின் விஹாராதிபதி தங்கல்லே சாரத தேரர், மாளிகாவத்தை இந்துக்கோவிலின் பிரதம குருக்கள் இரா நீதிராஜ குருக்கள், மாளிகாவத்தை வைத்தியசாலையின் பிரதான வைத்தியர் ருச்சிர சமனபால, வைத்தியசாலையின் நிருவாக உத்தியோகத்தர் திருமதி மெனிக்கே, கொழும்பு பிரதேசச் செயலகத்தின் அதிகாரி அஜித் சமந்த குமார, மாளிகாவத்தை பொலிஸ் நிலையத்தின் பிரஜா பொலிஸ் பிரிவுப் பொறுப்பதிகாரி எம்.டபிள்யு.எம்.விஜயகோன் ஆகியோர் நிகழ்வில் கலந்து கொண்டு உரையாற்றினர்.

 

 

ஊடகப்பிரிவு

அகில இலங்கை ஜம்இய்யத்துல் உலமா



 

 

ACJU/MED/2020/006

04.06.2020  12.10.1441

அகில இலங்கை ஜம்இய்யத்துல் உலமா விடுக்கும் அனுதாபச் செய்தி

 

அஷ்-ஷைக் எம்.ஐ.எம். ஹனீபா (பஹ்ஜி) அவர்களின் மரணச் செய்தி எம்மைக் கவலையில் ஆழ்த்துகின்றது. அகில இலங்கை ஜம்இய்யத்துல் உலமாவின் முன்னால் தலைவர்களில் ஒருவரான அஷ்ஷைக் இப்ராஹிம் இப்னு ஒமருலெப்பை அவர்களின் புதல்வரும், நாடறிந்த உலமாக்களில் ஒருவருமான அஷ்-ஷைக் எம்.ஐ.எம் ஹனீபா (பஹ்ஜி)  அவர்கள் இன்று (04.06.2020) வபாத்தானார்கள். இன்னா லில்லாஹி வஇன்னா இலைஹி ராஜிஊன்.

 

கண்டி தஸ்கர ஹக்கானிய்யா அரபுக் கலாபீடத்தின் ஆயுட்கால தலைவராகவும், சிரேஷ்ட விரிவுரையாளராகவும் கடமையாற்றி வந்த இவர்கள் தனது வாழ்நாளை கல்வி மற்றும் தீன் பணிக்காகச் செலவழித்தார்கள். இவர்கள் பல்லாயிரம் மாணவர்களின் ஆசிரியராக திகழ்ந்ததுடன் நடுநிலையானப் போக்கோடு இருந்து வந்தார்கள்.

 

அரசாங்கப் பாடசாலை ஆசிரியரான இவர்கள் இலங்கையின் பல பாடசாலைகளில் ஆசிரியராகவும் கடமையாற்றியுள்ளார்கள். தஸ்கர ஹக்கானிய்யா அரபுக் கல்லூரியுடன் பிணைந்து செயற்பட்ட இவர்கள் இறுதி வரை கல்விப் பணிக்காகவே தன்னை அர்ப்பணித்து செயற்பட்டார்கள். இதன் விளைவாக பல கல்விமான்களை இப்பூமியில் உருவாக்கியப் பெருமை இவரைச் சாரும்.

 

எல்லாம் வல்ல அல்லாஹுதஆலா அன்னாரது நல்லமல்களை அங்கீகரித்து, சகல பிழைகளையும் பொறுத்து, நல்லடியார்களின் கூட்டத்தில் சேர்த்தருள்வானாக. அவர்களது குடும்பத்தினர், மாணவர்கள் அனைவருக்கும் ஆறுதலையும் நற்கூலியையும் வழங்குவானாக, ஆமீன்.

 

வஸ்ஸலாம்.

 

அஷ்-ஷைக் எம்.எம்.ஏ. முபாறக்

பொதுச் செயலாளர்

அகில இலங்கை ஜம்இய்யத்துல் உலமா

 

 

 

03.06.2020 CE / 11.10.1441AH

புறநிழல் சந்திர கிரகணம் தொடர்பாக

 

இவ்வருடம் ஜூன் மாதம் 05 மற்றும் 06 ஆம் திகதிகளில் (வெள்ளி மற்றும் சனிக்கிழமை) இன்ஷா அல்லாஹ் புறநிழல் சந்திர கிரகணம் (Penumbral Lunar Eclipse) ஏற்படவுள்ளதாக வானியல் அறிக்கைகள் தெரிவிக்கின்றன. நிகழவிருக்கும் இப்புறநிழல் சந்திர கிரகணம் கொழும்பு நேரப்படி வெள்ளிக்கிழமை (05 ஆம் திகதி) இரவு 11:15 மணி முதல் சனிக்கிழமை அதிகாலை 02:34 மணி வரை ஏற்படவுள்ளதாகவும் அது இலங்கையில் தென்படலாம் எனவும் அவ்வறிக்கைகள் தெரிவிக்கின்றன.

புறநிழல் சந்திர கிரகணத்தின் போது சந்திரனின் வெளிச்சத்தில் மங்கலான ஒரு நிலையே ஏற்படும். சந்திரன் பூரணமாகவோ அல்லது அதில் ஒரு பகுதியோ மறைவதில்லை. சூரியன் அல்லது சந்திரன் முழுமையாக அல்லது அவற்றில் ஒரு பகுதி மறைவதைக் காணும் போதுதான் கிரகணத் தொழுகை நிறைவேற்றப்படுவது சுன்னத்தாகும். எனவே, புறநிழல் கிரகணத்தின் போது கிரகணத் தொழுகை நிறைவேற்றப்படுவது சுன்னத்தாகமாட்டாது. இதனடிப்படையில் இதன்போது கிரகணத் தொழுகையை நிறைவேற்ற அவசியமில்லை என்பதைக் கவனத்திற் கொள்ளவும்.

“சூரியன் மற்றும் சந்திரன் அல்லாஹ்வின் அத்தாட்சிகளில் இரண்டு அத்தாட்சிகளாகும். ஒருவருடைய மரணத்திற்காகவோ அல்லது ஒருவரின் பிறப்பிற்காகவோ அவை மறைவதில்லை. ஆகவே அவ்விரண்டையும் நீங்கள் (மறையக்) கண்டால் அல்லாஹ்விடம் இறைஞ்சுங்கள், தக்பீர் சொல்லுங்கள், தொழுகையில் ஈடுபடுங்கள், தர்மம் செய்யுங்கள்” என்று நபி ஸல்லல்லாஹு அலைஹி வஸல்லம் அவர்கள் கூறினார்கள்.

(ஸஹீஹுல் புகாரி - 1044)

 

அஷ்-ஷைக் எம். அப்துல் வஹ்ஹாப் 

பிறைக் குழு இணைப்பாளர்

அகில இலங்கை ஜம்இய்யத்துல் உலமா

25.05.2020

அகில இலங்கை ஜம்இய்யத்துல் உலமாவின் பெருநாள் வாழ்த்துச் செய்தியின் திகதி தொடர்பாக

 

வருடாந்தம் அகில இலங்கை ஜம்இய்யத்துல் உலமாவினால் பெருநாள் வாழ்த்துச் செய்தி வெளியிடப்படுவதை யாவரும் அறிந்ததே. அந்த வகையில் இவ்வருடம் (2020 ) ஹிஜ்ரி 1441 ஆம் ஆண்டுக்கான நோன்புப் பெருநாள் வாழ்த்துச் செய்தியும் ஜம்இய்யாவின் ஊடகப் பிரிவால் வெளியிடப்பட்டது.

 

தமிழ், சிங்கள மொழியிலான அவ்வாழ்த்துச் செய்தியில் 24.05.2020 என திகதியிடுவதற்குப் பதிலாக 23.05.2020 என ஜம்இய்யாவின் ஊடகப் பிரிவினால் தவறுதலாக இடப்பட்டிருந்தது. அதற்காக வருந்துகிறோம்.

 

தவறைச் சுட்டிக்காட்டிய அனைவருக்கும் நன்றிகளைத் தெரிவித்துக் கொள்கின்றோம். அல்லாஹுதஆலா நம்மனைவரது செயற்பாடுகளையும் பொருந்திக் கொள்வானாக.

 


எம்.எச்.எம். பர்ஹத்
ஊடகப் பிரிவு ஒருங்கிணைப்பாளர்,
அகில இலங்கை ஜம்இய்யத்துல் உலமா

ACJU/MED/2020/005

23.05.2020 / 29.09.1441

அகில இலங்கை ஜம்இய்யத்துல் உலமா விடுக்கும் நோன்புப் பெருநாள் செய்தி

கொவிட் 19 காரணமாக மிகவும் நெருக்கடியான சூழ்நிலையில்  ஒரு மாத காலம் தொடராக நோன்பு நோற்று, நற்காரியங்களில் ஈடுபட்டு விட்டு இன்று பெருநாளைக் கொண்டாடுகின்ற அனைத்து முஸ்லிம்;களுக்கும் அகில இலங்கை ஜம்இய்யத்துல் உலமா தனது ஈதுல் ஃபித்ர் பெருநாள் வாழ்த்துக்களை தெரிவித்துக் கொள்கின்றது. அல்லாஹுதஆலா நாம் நோற்ற நோன்பை அங்கீகரித்து அவனது உயரிய நற்கூலியை தந்தருள வேண்டுமென பிரார்த்தனையும் செய்கின்றது.

எமது நாட்டையும், நாட்டு மக்களையும் கொவிட் 19 யின் தாக்கத்திலிருந்து பாதுகாக்க வேண்டும் என்ற உயரிய நோக்கோடு வழமை போன்றல்;லாது சுகாதார மற்றும் பாதுகாப்பு துறையினரின் வழிகாட்டல்களைப் பூரணமாக ஏற்று மிகவும் எளிமையான முறையில் தத்தமது குடும்ப அங்கத்தவர்களுடன் மாத்திரம் வீட்டில் இருந்த படியே இம்முறை பெருநாளைக் கொண்டாட ஏற்பாடுகளைச் செய்திருக்கின்றோம். தொடர்ந்தும் எமது தாய்நாட்டை இந்த தொற்று நோயிலிருந்து பாதுகாப்பதற்காக நாங்கள் ஒவ்வொருவரும் உறுதிபூண்டு ஒற்றுமையுடன் ஒன்றாக செயற்பட அல்லாஹுதஆலா  அருள் புரிய வேண்டும் என்று நாம் பிரார்த்திக்கின்றோம்.

இவ்வினிய தினத்தில் இஸ்லாமிய போதனைகளை உரிய முறையில் பின்பற்றுவதுடன் முழு உலக மக்களும், குறிப்பாக எமது தாய் நாடும்; இந்த வைரஸின் தாக்கத்திலிருந்து விடுபட அனைவரும் பிரார்த்திக்க வேண்டும்.

இந்த வைரஸ் தொற்றிலிருந்து எமது நாட்டை மீட்டெடுப்பதற்காக பாடுபடும் அரசாங்கம், அரச ஊழியர்கள், உத்தியோகத்தர்கள் மற்றும் இந்த நெருக்கடி சூழ்நிலையில் மிகவும் அர்ப்பணிப்புடன் கூடிய சேவைகளை வழங்கி வரும் சுகாதார சேவைப் பணியாளர்கள், முப்படைகள், பொலிஸ் உத்தியோகத்தர்கள் அனைவருக்கும் இன்றைய இனிய நோன்புப் பெருநாள் தினத்தில் மனமார்ந்த நன்றிகளை அகில இலங்கை ஜம்இய்யத்துல் உலமா தெரிவித்துக் கொள்கின்றது.

 

 

அஷ்-ஷைக் எம்.எஸ்.எம். தாஸிம்

உதவிப் பொதுச் செயலாளர்

அகில இலங்கை ஜம்இய்யத்துல் உலமா

ACJU/FTW/2020/05

22.05.2020

28.09.1441

 

அன்புடையீர்,

அஸ்ஸலாமு அலைக்கும் வறஹ்மத்துல்லாஹி வபறகாத்துஹூ

 

இவ்வருட நோன்புப் பெருநாள் தொழுகை சம்பந்தமான சில வழிகாட்டல்கள்

 

  1. ஏலவே அறிவுறுத்தப்பட்டதற்கு ஏற்ப நாட்டில் ஏற்பட்டிருக்கும் அசாதாரன சூழ்நிலையைக் கருத்திற் கொண்டு பெருநாள் தொழுகையை வீட்டில் ஜமாஅத்தாக நிறைவேற்றிக் கொள்ள வேண்டும்.

 

  1. பெருநாள் தொழுகையை நிறைவேற்றுவது சுன்னத் முஅக்கதாவாகும். இதனை தனியாக தொழுவதற்கு அனுமதியிருந்தாலும், ஜமாஅத்தாக நிறைவேற்றுவதே சிறந்ததாகும்.

 

  1. சூரியன் உதயமானதிலிருந்து உச்சத்தை அடையும் வரை பெருநாள் தொழுகையை நிறைவேற்ற முடியும். என்றாலும், சூரியன் ஓர் ஈட்டிப் பிரமானம் உயர்ந்ததிலிருந்து (15 நிமிடங்கள் கழிந்ததிலிருந்து) தொழுது கொள்வது சிறந்ததாகும்.

 

  1. பெருநாள் தொழுகைக்கென அதான், இகாமத் கிடையாது.

 

  1. பெருநாளுடைய தொழுகை இரண்டு ரக்அத்கள் கொண்ட தொழுகையாகும். சுன்னத்தான நோன்புப் பெருநாள் தொழுகையைத் தொழுவதாக நிய்யத் வைத்து, தக்பீர் கூறி கைகளைக் கட்டியதன் பின் வஜ்ஜஹ்த்து துஆவை ஓதுவது சுன்னத்தாகும்;;. இது போன்ற ஹதீஸில் வந்துள்ள வேறு துஆக்களையும் ஓதலாம்.

 

  1. பின்னர் ஏழு தக்பீர்கள் கூறி ஒவ்வொரு தக்பீருக்கும் ஆரம்ப தக்பீர் போன்று கைகளை உயர்த்திக் கட்டுதல் வேண்டும். அவ்வாறே, இரண்டாவது ரக்அத்திலும் முதல் தக்பீர் (ஸூஜுதிலிருந்து நிலைக்கு வரும்) தவிர்த்து ஜந்து தக்பீர்கள் கூறி, கைகளைக் கட்டிக்கொள்ளுதல் வேண்டும். இரண்டு ரக்அத்துக்களிலும் ஒவ்வொரு தக்பீர்களுக்குமிடையில், سُبْحَانَ اللهِ، وَالْحْمدُ لِلّهِ، وَلَا إِلهَ إِلَّا اللهُ، وَاللهُ أَكْبَرُ போன்ற திக்ர்களை  ஓதிக்கொள்ளலாம்.

 

  1. இரண்டு ரக்அத்திலும் தக்பீர்கள் முடிந்ததன் பின் ஸூரத்துல் ஃபாத்திஹாவை ஓதுவது கட்டாயமாகும். பிறகு, ஏதாவது ஒரு ஸூராவை ஓதுவது சுன்னத்தாகும். ஒரு ஸூராவும் மனனமில்லை என்றால் ஸூரத்துல் ஃபாத்திஹா மாத்திரம் போதுமானது.

 

  1. என்றாலும், முதலாவது ரக்அத்தில் ஸூரத்துல் (الأعلى) அஃலாவையும், இரண்டாவது ரக்அத்தில் ஸூரத்துல் (الغاشية) ஙாஷியாவையும் மனனமுள்ளவர்கள் ஓதுவது சுன்னத்தாகும்.

 

  1. ஒருவர் தனியாக தொழுகையை நிறைவேற்றினால் அவர் பெருநாள் தொழுகையான இரண்டு ரக்அத்துக்களை மாத்திரம் தொழுது கொள்வார்.

 

  1. இரண்டு நபர்கள்; அல்லது அதைவிடக் கூடுதலானவர்கள் இருந்தால் குத்பாவை நிகழ்த்தலாம். ஜுமுஆவுக்குத் தேவையான எண்ணிக்கை அவசியமில்லை.

 

  1. பெருநாள் தொழுகையின் பின், பெருநாளுடைய குத்பாவை நிகழ்த்துவது சுன்னத்தாகும். அது ஜுமுஆவுடைய குத்பாவைப் போன்று நிகழ்த்தப்படல் வேண்டும். என்றாலும், பெருநாளுடைய முதலாவது குத்பாவை ஒன்பது தக்பீர்களைக் கொண்டும், இரண்டாவது குத்பாவை ஏழு தக்பீர்களைக் கொண்டும் ஆரம்பித்தல் வேண்டும்.

 

  1. ஜுமுஆவுடைய இரு குத்பாக்கள் போன்று பெருநாளுடைய குத்பாவையும் செய்தல் வேண்டும். இரு குத்பாக்களிலும் பின்வருவனவற்றை அறபியில் கூறுவது போதுமானது.

الْحْمدُ لِلّهِ

والصّلاَةُ  والسّلاَمُ عَلَى مُحَمَّدٍ رَسُوْلِ اللهِ صَلَّى اللهُ عَلَيْهِ وَسَلَّمَ

واتَّقُوا الله

 

மேலும், இரு குத்பாக்களில் ஏதாவது ஒன்றில் அல்-குர்ஆன் வசனம் ஒன்றை ஓதுதல். இரண்டாவது குத்பாவில் اللهُمَّ اغْفِرْ لِلمُؤمِنِيْنَ والمُؤْمِنَاتِ என்று கூறி முஃமின்களுக்காக துஆச் செய்து குத்பாவை நிறைவு செய்தல் வேண்டும். மாதிரி குத்பா இணைக்கப்பட்டுள்ளது.

  1. குத்பாவை நிறைவு செய்ததன் பின் விரும்பினால் உபதேசம் ஒன்றை நிகழ்த்தலாம்.

 

  1. மேற்குறித்த விடயங்களை ஓதி குத்பாவை நிகழ்த்தக் கூடியவர் யாரும் இல்லையெனில் தொழுகையுடன் போதுமாக்கிக்கொள்ள முடியும். ஏனெனில், பெருநாள் தொழுகை நிறைவேறுவதற்கு குத்பா அவசியமில்லை.

 

  1. ஜமாஅத்தாக தொழும்போது ஆண்களே இமாமத் செய்தல் வேண்டும்;. பெண்கள் மாத்திரம் ஜமாஅத்தாக தொழும் நிலை ஏற்பட்டால், பெண்களில் ஒருவர் இமாமத் செய்ய முடியும். இச்சந்தர்ப்பத்தில் பெண்களுக்கு குத்பா இல்லை. பெண்களில் ஒருவர் சிறிய உபதேசம் ஒன்று செய்து கொள்ளலாம்.

 

  1. தற்கால அசாதாரண சூழ்நிலையைக் கருத்திற்கொண்டு, பெருநாள் தொழுகை மற்றும் குத்பாவை வீட்டில் உள்ளவர்கள் மாத்திரம் ஒன்று சேர்ந்து நிறைவேற்றல் வேண்டும்.

 

  1. ஸகாத்துல் ஃபித்ரை நிறைவேற்றக் கடமைப்பட்டவர்கள், பெருநாள் தொழுகைக்கு முன்பு அதனை பூர்த்தி செய்திருத்தல் வேண்டும்.

 

  1. பெருநாளுடைய நாளில் மேற்கொள்ளப்படும் சுன்னத்தான காரியங்களை நாட்டின் சட்டதிட்டங்களை மதித்து நிறைவேற்றிக் கொள்ளல் வேண்டும்.

 

 

அஷ்ஷைக் எம்.எல்.எம். இல்யாஸ்

செயலாளர் - ஃபத்வாக் குழு

அகில இலங்கை ஜம்இய்யத்துல் உலமா

 

அஷ்ஷைக் ஐ.எல்.எம். ஹாஷிம் ஸூரி

மேற்பார்வையாளர் - ஃபத்வாக் குழு    

அகில இலங்கை ஜம்இய்யத்துல் உலமா

               

அஷ்ஷைக் முப்தி எம்.ஐ.எம். ரிழ்வி

தலைவர்

அகில இலங்கை ஜம்இய்யத்துல் உலமா

 

   

 

மாதிரி பெருநாள் குத்பா

முதலாவது குத்பா :

اللَّهُ أَكْبَرُ  اللَّهُ أَكْبَرُ اللَّهُ أَكْبَرُ اللَّهُ أَكْبَرُ اللَّهُ أَكْبَرُ اللَّهُ أَكْبَرُ اللَّهُ أَكْبَرُ  اللَّهُ أَكْبَرُ اللَّهُ أَكْبَرُ الْحَمْدُ لِلَّهِ وَالصًّلاَةُ وَالسَّلَامُ عَلَى مُحَمَّدٍ رَسُولِ اللَّهِ صَلّى الله عَلَيْهِ وَسَلًّمَ. أٌمّا بَعْدُ

يَا أًيُّهَا النَّاسُ اتَّقُوا الله قَالَ الله تَعَالىَ أَعُوْذُ بِالله مِنَ الشَّيْطَانِ الرَّجِيْمِ بِسْمِ اللَّـهِ الرَّحْمَـٰنِ الرَّحِيمِ إِنَّا أَعْطَيْنَاكَ الْكَوْثَرَ فَصَلِّ لِرَبِّكَ وَانْحَرْ إِنَّ شَانِئَكَ هُوَ الأَبْتَرُ

وقال النبي صلى الله عليه وسلم قال: ((الدِّين النَّصِيحَةُ))

أَسْتَغْفِرُ اللهَ لِيْ وَلَكُمْ فَاسْتَغْفِرُوْهُ إنَّهُ هُوَ الغَفُوْرُ الرَّحِيْمُ

இரண்டாவது குத்பா :

 

اللَّهُ أَكْبَرُ اللَّهُ أَكْبَرُ اللَّهُ أَكْبَرُ اللَّهُ أَكْبَرُ  اللَّهُ أَكْبَرُ اللَّهُ أَكْبَرُ اللَّهُ أَكْبَرُ الْحَمْدُ لِلَّهِ وَالصلاة والسَّلَامُ عَلَى مُحَمَّدٍ رَسُولِ اللَّهِ صَلَّى اللهُ عَلَيْهِ وَسَلَّمَ. أمَّا بَعْدُ

يَا أَيُّهَا النَّاسُ اتَّقُوا اللهَ قَالَ اللهُ تَعَالى أَعُوذُ بِاللهِ مِنَ الشَّيْطَانِ الرَّجِيمِ بِسْمِ اللَّـهِ الرَّحْمَـٰنِ الرَّحِيمِ قُلْ هُوَ اللَّهُ أَحَدٌ اللَّهُ الصَّمَدُ لَمْ يَلِدْ وَلَمْ يُولَدْ وَلَمْ يَكُن لَّهُ كُفُوًا أَحَدٌ

وَارْضَ  اللّهُمَّ عَنِ الخُلَفَاءِ الأَرْبَعَةِ وَجَمِيْعِ الصَّحَابَةِ رَضِيَ اللهُ عَنْهُمْ أَجْمَعِيْنَ.

اللهُمَّ اغْفِرْ لِلمُؤمِنِيْنَ والمُؤْمِنَاتِ والمُسْلِمِينَ والمُسْلِمَاتِ

بِرَحْمَتِكَ يَا أَرْحَمَ الرَّاحِمِيْنَ