01 සූරා අල් ෆාතිහා (ආරම්භය)
මෙය මක්කී* පරිච්ඡේදයකි. ආයතයන් 7 කි.

بِسْمِ اللَّهِ الرَّحْمَٰنِ الرَّحِيمِ ‎﴿١﴾‏

(1) සැමට කරුණාභරිත පරම කරුණාභරිත අල්ලාහ්ගේ නාමයෙන් ආරම්භ කරමි.

الْحَمْدُ لِلَّهِ رَبِّ الْعَالَمِينَ ‎﴿٢﴾‏

(2) සියලු පැසසුම් සමස්ත විශ්වයේ¹ රබ්(පරමාධිපති)² වන අල්ලාහ් සතුය.

1) මෙහි අන්තර්ගත අරාබි පදය නම් ‘ආලමීන්’ යන පදයයි. එම වචනයට සමස්ත විශ්වය හා එහි අන්තර්ගත සියලු නිර්මිත දෑ යන ආසන්න අර්ථය දෙනු ලැබූව ද මෙහි දී ‘සමස්ත විශ්වය’ යනුවෙන් භාවිත කර ඇත්තෙමු.
2) ‘රබ්’ යන වචනයෙන් ‘විශ්වය මවා එය පරිපාලනය කොට පෝෂණය කොට රැකවරණය සපයා පවත්වාගෙන යන්නා’ යන අදහස ලබා දෙයි. මේ සඳහා කෙටියෙන් ‘පරමාධිපති’ යනුවෙන් මෙහි දී හඳුන්වා ඇත්තෙමු.

الرَّحْمَٰنِ الرَّحِيمِ ‎﴿٣﴾  

(3) සැමට කරුණාභරිත හා පරම කරුණාභරිත වූත්,

مَالِكِ يَوْمِ الدِّينِ ‎﴿٤﴾

(4) විපාක ප්‍රදාන දිනයේ අධිපති වූත් (අල්ලාහ්ටමය සියලු පැසසුම්).

إِيَّاكَ نَعْبُدُ وَإِيَّاكَ نَسْتَعِينُ ‎﴿٥﴾  

(5) අපි ඔබවම පමණක් නමදින්නෙමු. ඔබගෙන්ම පමණක් උපකාර පතන්නෙමු.

اهْدِنَا الصِّرَاطَ الْمُسْتَقِيمَ ‎﴿٦﴾

(6) අපව ඍජු මගට රැගෙන යනු මැනව!

صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ ‎﴿٧﴾

(7) (එය කෙසේද යත්) ඔබ කවුරුන් කෙරෙහි ආශිර්වාද කළෙහි ද³ ඔවුන්ගේ මගයි. ඔබගේ උදහසට ලක්වූවන්ගේ හා වැරදි මාර්ගයෙහි ගියවුන්ගේ මග නොවේ.

3) විස්තර සඳහා අල් කුර්ආන් 4:69 වන ආයතය බලන්න.